بین الاقوامی

سری لنکا دہشت گردی، جرمنی کی مسلم کونسل کا اظہار یکجہتی کے لیے ملکی دورہ

تفصیلات کے مطابق جرمن مسلمانوں کی مرکزی کونسل اظہار یکجہتی کے لیے سری لنکا کا دورہ کرے گا، اس دوران مسیحی، مسلم اور بدھ مت کمیونٹی سے ملاقاتیں ہوں گی۔ سری لنکا کے گرجا گھروں اور ہوٹلوں پر ہونے والے دہشت گردانہ حملوں کے دو ہفتے بعد جرمنی میں مسلمانوں کی مرکزی کونسل کے سرکردہ اراکین اس ملک کا دورہ کر رہے ہیں تاکہ سری لنکن عوام کے ساتھ اظہار یکجہتی کیا جا سکے۔

غیرملکی خبررساں ادارے کے مطابق جرمنی میں مسلمانوں کی مرکزی تنظیم (زیڈ ایم ڈی) کے جنرل سیکریٹری عبدالصمد الیزیدی، ماہر علوم اسلامی عبدالمالک حبوئی اور زیڈ ایم ڈی کی علماء کونسل کے متعدد اراکین سری لنکا میں آئندہ جمعے تک سرکاری حکام کے ساتھ ساتھ مسیحی، مسلم اور بدھ مت کمیونٹی کے اراکین سے ملاقاتیں کر رہے ہیں۔

سری لنکا میں ہونے والے دہشت گرد حملوں کے بعد حالات آہستہ آہستہ معمول پر آرہے ہیں، جبکہ ملک بھر میں گرجا گھروں کو بھی کھول دیا گیا ہے، البتہ سیکیورٹی ہائی الرٹ ہے۔ خیال رہے کہ سری لنکن آرمی چیف کا برطانوی خبررساں ادارے کو انٹرویو میں کہنا تھا کہ حملے میں ملوث ملزمان بھارت کا دورہ کرچکے تھے، وہ بھارت کے زیرتسلط کشمیر، بنگلور اور ریاست کیرالا بھی گئے تھے۔

سری لنکا میں ایسٹر کے روز ہلاکت خیز دھماکوں کے بعد پیدا ہونے والی صورت حال سے نمٹنے کی کوششوں میں خواتین کے برقعہ پہننے پر پابندی لگا دی گئی ہے۔

Source
ARY News

مزید خبریں

شیئر کریں
Close